良哥你畫漫畫耐定係學詠春耐?兩者幾多年?

我學詠春就18年，睇漫畫就超過25年。入行已經超過20年，你話邊樣耐.....

兩者都是你的興趣? 點解會畫漫畫作為職業?

我自小已經很鍾意漫畫，尤其係港產的漫畫係我既至愛。家裡的漫畫更多都數都數唔哂，你講到書名的我都睇過。既然我自己的興趣同理想咁一致，機緣巧合下做了依行囉。

你畫邊一種漫畫?

畫港產漫畫（邊間就唔好講），我主要係負責背景上色。不是這行開始出現沒落，新一代喜歡日本漫畫多於港產漫畫。另一方面，讀者的要求愈來愈高，出品一定要靚先有長期讀者。

會不會因畫武術漫畫的關係，所以學詠春？

因為有同事話有個好勁的詠春師傅，佢係李小龍個師傅個仔，咁我咪拜師學功夫。最有趣係推薦我學個人，本身反而係玩「某某仁龍拳」，話唔想比師兄弟見到，結果佢冇學，我一學便玩到而家。

漫畫天馬行空，又有無幫助你滆入詠春拳的對拆？

絕對有！我日日對住草稿，見畫師畫到好情緒高漲，好投入。我當然冇即場踢爆漫畫入面的攻擊唔掂啦！！！應該係先來一個轉馬消佢攻擊，然後進碼日字中拳KO佢！！！哈哈

相反會不會因你學了詠春，畫漫畫時有助你表達畫面的拳法？

都冇咩關係，因為詠春裡面黐手集中係感覺，反而畫漫畫要的係我畫畫基本功同技巧。

多年來你有無想過以詠春為題材出漫畫？

冇啦，漫畫要有收視，一定要誇張，詠春要真實，不能失實，所以唔會啦！

講返你玩詠春有成十八年之久，當年你有無好似漫畫般上館拜師？

師公好隨和，無漫畫咁要跪同敬茶的儀式，就好像現在你學師咁，同師父的關係都好似朋友咁。

我知當年你同家錩師傅是同期師兄弟，葉準師傅為人係點？

當時學拳要上葉準師傅家，家錩又係跟師傅學緊，後生仔容易熟，所以師兄弟都感情幾好，不過當年同期已經走哂。葉準師傅的為人好隨和，給予我感覺係你想學什麼佢便教。所以佢影響到我用同一態度，學生想學我便儘力教。

有無想過你可以玩詠春會到現在？仲教成為師父級教拳呢？

開始學拳時我都冇諗咁多，葉準師傅教我乜我咪學乜囉！不過大約學了詠春二至三年時發覺難突破，之後我淨係每日早晚練習，什麼都唔諗、唔理自己有冇進步，練了一段基本功之後就完全無問題啦。後來越來越覺得好玩又有興趣，一玩便十八年了。我學拳時候冇諗住將來會教人，自己既心態好持上當年既葉準咁，比較隨緣和順其自然。

我知良哥你每日都會綀習，綀什麼？用幾多時間？

我每日都有練習，大約個零鐘。最重要係堅持同信念。主要係練小念頭、轉碼、扯拳...。

學詠春是不是永無止境？

絕對是！所以每日都有練習，學海無涯是也。

良哥你性格沉實，我想問不同性格學詠春，出來的功架是不是有不同?

梗係!不過一定要謹記，千期唔好持住識詠春肆無忌憚。最後麻煩到你自己唔好啦！

你畫公仔咁叻，和對手對拆時，會不會容易觀察對手的面相的變化，知道對方的情緒和預計下一步呢？

睇面相同玩詠春都有對應?！咁講，黐手時你會留意對方對眼睛，好明顯你目睹佢眼睛方向有所改變時，你會猜測佢想點！但係詠春講係你的手感，你的感覺經過長時間練習之後，反應會快過視力。所以面對老手你千奇唔好諗住偷雞！

其實你由學詠春到現在成師教人，對你自己人生有什麼啟發？

堅持、做啦、好像廣告slogan "JUST DO IT" 。日子有功，必有所成。人生要有希望同理想，做到好成績一定付出。

你為了詠春用了咁多時間，你太太是否支持？

基本上佢好支持我，我每天練拳佢都有給予時間同支持。身邊的人支持好重要，因為詠春係長時間練習先有小成，係度都要多謝老婆。

有咩忠告比新同學，等 佢可以快上手？

「唔好諗咁多，做左先，不要問，只是信。」因為所有功夫都係有佢既信念同拳法，冇話邊個最勁、最好。練習多了自然會進步。天份當然有別，但係努力才是最重。

玩了咁多年詠春，有冇真正應用過？例如自我防衛咁？

冇真正應用過，不過試過有二次晌街到比人話我卑佢，仲想有行動添，我冇睬佢仲施施然咁走。(這就是良哥性格，淡定！）

咁聽說你會8月份開班授徒，有冇咩期望？

隨緣！我只係想教授有興趣玩呢種運動。反正詠春適合所有人。

 
後話：  
跟良哥訪問好似和他黐手時，有一種難以觸摸的感覺，我問得多他答得簡單，我呆著正找位置再發問，冷不防良哥又會突如其來的兩三句「答案」。良哥那種深不見底（可以說是深藏不露）的性格，不過只要找他教路時，他會表現出樂意之極和歡迎的態度，立即伸出雙手等待我提起雙手練習。我很佩服良哥則以簡單的「信任」，把自己投入詠春運動，還把它發揚下去。